غول
غووووول، انا قربت اجبلك القربان استعد، الكنز هيكون ليا وبس ..
معكم(..) من قناة(..) أهلََا بكم في الموجز، شرع محامٍ مصري في أواخر العام الماضي تطبيق فكرة زواج التجربة والتي الهدف منها هي الحد من انتشار الطلاق في المجتمع المصري، والحفاظ على كيان الأسرة المصرية..
********
-يا حامد ده انت لسا جاي المنطقة اديلك شهرين وكمان يعني الناس انت لسا مخدتش عليهم ومخدوش عليك ما تصبر ودور تاني ايه اللي عاجبك في آلاء دي مُطلقة ومبتخلفش كمان؟
وكمان دي خُلقها ضيق، وانت مش هتستحمل.
كل يوم هتكون في مشاكل ونقرك من نقرها بلاش آلاء يابني.
رد حامد وقاله: يا مصطفى افهم انا عايز حد يملى عليا حياتي، بدل ما انا وحيد كدا لا ليا اب ولا ام ولا عم حتى ده انا مقطوع من شجرة.
ودي يعني كمان مقطوعة من شجرة فيها ايه لما نكون في حياة بعض.
مصطفى:يابني ما انا اديني في حياتك اهو ما كل يوم اهو بنسهر والدنيا ماشية معانا فل ليه انت غاوي وجع دماغ وطلبات بقا، طب حتى شوف حد تاني ع الأقل يكون بيخلف.
رد حامد عليه بنبرة فيها كسرة: ومين هترضى بواحد مُطلق يا مصطفى، ما انا روحت واتقدمت قبل كدا واول ما عرفوا اني مطلق حطولي شروط سم نيش بالشئ الفلاني ومتطلبات تعجز الواحد حرفيََا يا كدا يا اما مش هيجوزوني بنتهم، آلاء طيبة وبنت حلال وانا شايف فيها الزوجة الأصيلة اللي هتكون سند لجوزها.
حامد: خلاص بما انك عزمت أمرك يبقى نروح للحاج جمال، ده اكبر شخص في العمارة واحنا كلنا ولاده نروح نفاتحه في الموضوع وهو يتكلم مع آلاء، وان شاء الله ربنا يقدم اللي فيه الخير، على آخر اليوم كدا ان شاء الله نروحله.
****************
وعلى آخر اليوم طلع مصطفى مع حامد عند الحاج جمال.
خبط مصطفى وسلم ع حاج جمال وظهر من ورا مصطفى، حامد.
وبدأ الحاج جمال يقلب نظره في حامد، استئذن مصطفى من الحاج جمال ان هما عايزينه في حاجة ضروري، عم جمال سكحلهم بالدخول وبعد السلامات وان الحاج جمال كان مُصر ان هما يشربوا حاجة بس مصطفى قاله ان هما عايزينه في موضوع شخصي.
مصطفى: ياعم جمال ده حامد الجار الجديد مبقالوش شهرين هنا في العمارة وكان عايز منك خدمة بما انك كبيرنا واننا بنعتبرك زي ابونا والله.
حامد:بص يا عم جمال انا بصراحة انا بحب آلاء وكنت عايز منك تفاتحها في موضوع اني اتقدملها لأنها بتعتبرك زي ابوها وكمان البنت مقطوعة من شجرة فا معرفتش اروح لمين عشان يفاتحها فا ملقتش ملجأ غيرك يا راجل يا طيب.
اتنهد الحاج جمال وقال: صلوا على النبي يا شباب، البنت دي زي بنتي وانا مش برضالها الوحش خالص وبصراحة يابني هي مقفولة بسبب انها اطلقت وكمان البنت مش صغيرة البنت ٣٠ سنة، وكمان البنت مش بتخلف يعني البت متعقدة جدََا، فا انا هحاول افاتحها يا حامد.
سكت وبعدها بص لحامد وضيق عنيه عليه كأنه شاكك فيه او ان حامد مش ده هدفه من الجوازة.
اتكلم بعدها وقال: ربنا وحده اللي عالم بالنوايا يا حامد يابني وان شاء الله اللي في قلبي يكون غلط، وانا هفاتحها ان شاء الله.
استئذن مصطفى وحامد انهم يمشوا بسبب ان وراهم اشغال ومصالح تانية.
بس فضل حاج جمال باصص لحامد نفس بصة الشك والريبة لحد ما الاتنين نزلوا من عند بيته.
حامد قال لمصطفى: ايه ياعم الراجل المجنون ده، كان بيبصلي كدا ليه وايه ربنا أعلم بالنوايا دي ده كبر وبيخرف ولا ايه.
مصطفى:لالا حاسب ده راجل بتاع ربنا، عم جمال احنا بنعتبره ولي من أولياء الله الصالحين ده راجل مكشوف عنه الحجاب لما بيقول على حاجة بتحصل، لما بيقول ع حد انه وحش يبقى هو وحش.
****************
كان بيبص للفراغ اللي قدامه وبدأ يتكلم مع حد مش موجود.
-وانت شايف ايه هل حامد هينفع يكون زوج لآلاء؟
بدأ يهز دماغه كأنه فاهم الكلام.
-ما انا عارف انك متعرفش النوايا،. واللي بيعرف النوايا هو ربنا سبحانه وتعالى، الراجل هيبيع أرضه ويعمل مشروع جمب شغله عشان يزود دخله.
بس مش عارف انا شاكك في الراجل ده، قلبي اتقبض اول ما شوفته كأني شوفت غول.
انا هفاتح آلاء وان شاء الله ربنا يقدم اللي فيه الخير.
*******************
-غووووول، انا قربت اجبلك القربان استعد، الكنز هيكون ليا وبس.
**************
(صوت خبط على الباب)
-أهلََا ازيك يا آلاء يابنتي.
آلاء: ازيك يا عم جمال انا كويسة الحمد لله اخبارك ايه يا والدي؟
عم جمال: انا كويس يابنتي، كنت عايز اكلمك في موضوع شخصي.
سمحت آلاء لعم جمال بالدخول وشاورلته يقعد.
دخل عم جمال في الموضوع وقال: انتي تعرفي جارنا حامد اللي لسا ساكن من شهرين ده؟
آلاء: اه اعرفه، ماله يا عم جمال.
بدأ عم جمال يحكيلها اللي حصل وان حامد عايز يتقدم وانه مش هامه ان البنت آلاء مش بتخلف وانه حاببها وهو عايز حد يكون شريك حياته، وكل طلبات آلاء مُجابة
آلاء: يا والدي انا بصراحة قلبي اتقفل ومتنساش ان طليقي كان بيعايرني بالعيب بتاعي واني مش بخلف واني أرض بور، وانا مش هستحمل اسمع الكلام اللي زي السم ده تاني.
عم جمال: لا يابنتي متخافيش، هو قالي مش هامه الخلفة هو هامه انك تكوني في حياته وخلاص.
آلاء: خلاص سبني افكر ياعم جمال، وكل شي قسمة ونصيب.
***********
بعد يومين قابلت الاء صدفه كانت زي القمر هي عندها 30 سنه وانا عندي 28 سنه بس عمري ما فكرت في فرق العمر اللي ما بيننا.
انا بحبها ونفسي فيها تكون ليا لوحدي.
قولتلها: سلام عليكم
ردت بابتسامة: وعليكم السلام ورحمة الله وبركاته، ان شاء الله النهاردة هقول لعم جمال ع قراري.
ومشيت وهي بتبتسم، عرفت خلاص كدا ان فيه خبر حلو ان شاء الله.
***************
-عم جمال زي ما قولتلك كل شي قسمه ونصيب وانا موافقة..
************
بس اللي آلاء متعرفوش ان هي وافقت على قطع تذكرة لقطر الموت.
***********
وفي خلال أيام كان حامد كاتب كتابه ع آلاء والفرحة كانت في المنطقة كلها وكله بيهني للعروسين.
*********
بعد ١٠ ايام من الفرح كان آلاء وحامد بيتغدوا لحد ما آلاء اتكلمت وقالت: حامد انا بشوف كوابيس.
انتبه حامد ليها وقال:كوابيس ايه؟
قالت آلاء: انا بشوف ناس واشكالهم غريبه اشكالهم مخيفه وفيهم واحد دول بيعتبروه زي القائد بتاعهم بيقول حاجه غير كلمه انا غول انتي هتكوني ملكي، انتي القربان.
الناس دي فيهم الطوال والقصيرين عاملين زي الشياطين اللي بنشوفهم في الأفلام، كانوا عمالين يلمسوا جسمي ومكان لمسهم بيسيب أثر حرق في جسمي وكنت بشوف غول دول عمال يكتب ع جسمي كلام غريب وانا خايفة اوي يا حامد.
حامد: يا حبيبتي ما تخافيش ممكن يكون بس انت بتتقلي في الاكل او حاجه ودي كوابيس عاديه يعني ما تخافيش يعني مين فينا مش بيحلم بكوابيس، يمكن بس عشان بتابعي أفلام الرعب كتير.
خلصوا الغدا وجه وقت العشا، حامد كان عمال ينادي على آلاء لحد ما دخل عليها الاوضه لقاها بتبص للفراغ اللي في الاوضه ومرة واحدة بدأت تصوت وتقول ابعدوا عني، ابعدوا عني الحقني يا حامد.
جري حامد عليها وبدأ يهديها بس هي زقته بكل قوتها وبدأ يخرج منها صوت أجش بيقول: انا غول، انا الحارس على كنز الأراضي المقدسة، انها القربان المناسب انه الوقت المناسب حان الوقت.
وعلى غير المتوقع ابتسم حامد وقال يلا نقدم القربان!
*********
-انا فين وايه الأرض دي وايه الشموع دي انت بتعمل ايه يا حامد؟
حامد بنبرة باردة:هقدمك قربان لغول!
الأرض دي تحتيها كنز وعشان الكنز يبقى ملكي لازم قربان والقربان لازم يكون من نسل حوا، انا لفيت مناطق كتير عشان اجيب القربان بس محدش كان بينفع للقربان.
لحد ما وصلت للمنطقة دي وغول جه وأبدى إعجابه بيكي، وكل اللي كنت محتاجه عقد جواز تجربة اللي انتو مضيتو عليه والمأذون كان واحد صاحبي، حط عقد جواز شرعي في الأول بس تحت العقد ده كان زواج التجربة.
ودلوقتي نبدأ الطقوس.
من الدنيا الفانية إلى حارس الأراضي المقدسة غول انهض من مرقدك فها هو قربانك، بحق العهود السليمانية عند باب الهيكل الكبير ببابل، طارش مارش قمطم قسورة أجب يا غول..
بدأ زلزال يحصل ومن تحت الأرض ظهر مدخل ومن المدخل ده طلع غول.
عنيه حمرا زي الدم كائن اسود عنده جناحات متقطعة جسمه قليل الحجم كأنه عجوز.
بسرعة سجد حامد لغول وقال: ها انا عبدك المطيع، هبني كنزك الثمين وهاهو قربانك يا سيدي.
غول اتكلم وقال: انتِ ملكي من الآن يا أدمية، ستكونين عبدة لي في العالم الآخر، لن ينقذك أحد......
قطع كلام غول آخر شخص كان حد يتوقعه بس انا بأمر الله أقدر أنقذها.
آلاء ببهجة: عم جمال!!!
************
انا حاسس ان آلاء هيحصلها حاجة يا مُنير، مش عارف ليه انا خايف من الولد ده.
مُنير: وصلتني اخبار حالََا من العَمار اللي في الشقة وبيقول ان فيه مارد اسمه غول حضر في جسم آلاء وان حامد عايز يقدم آلاء كقربان عشان تحت أرض حامد في كنز والكنز بيتطلب قربان، وهما دلوقتي عند الأرض.
عم جمال: يلا بسرعة نروح نلحقها.
****************
آلاء: الحقني ياعم جمال.
حامد:وانت بقا ياعم العجوز اللي هتنقذها يا حاج ده انت بتقف على رجلك بالعافية ده انا معايا غول يعني محدش يقدر يقربل...
(سيف الحكيم سليمان)!
الجملة دي قالها مُنير، الجن المسخر لمساعدة عم جمال.
اتجسد سيف وبتحاوطه هالة خضرا ومكتوب على السيف لا اله الا الله وفي ثانية كانت راس حامد خارجة برا جسمه...
=يا معشر الغيلان اخرجوا وانتقموا من الانسي وجنيه المساعد.
بدأت اشكال كتير تخرج من الحفرة وكلهم بيهاجموا عم جمال اللي خد آلاء وحطها ورا ضهره.
وبدأت الكائنات تيجي ع عم جمال وآلاء.
وبسرعة طلع عم جمال سبحة وبدأ يحركها بين صوابعه وظهرت هالة عاملة زي الدرع خليتهم محصنين من الكائنات دي.
بدأ منير انه ينده على اسامي ناس مش موجودة ومن وراه اتجسد مخلوقات من نور بدأت تقاتل الغيلان دي.
-حاسب ضهرك يا منير!!!
لكن كان الآوان فات لأن غول استغل انشغال منير مع الكائنات وقتله من ضهره!!
بدأت الغيلان تتشجع وتحاول تقضي على الكائنات اللي استدعاها منير.
بس من بعيد كان بدأت كائنات تانية تيجي وواضح ان الكائنات دي خلت الغيلان تخاف.
غول قال بصوته الأجش: مستحيل.. دول العَمار، جم ازاي مين استدعاهم؟
**********
مُنير: جمال شكل الارض دي هيبقى فيها غيلان كتير وهتبقى معركة صعبة معاهم.
جمال:طب وهنعمل ايه
مُنير:انا هقدر استدعي حد يساعدني بس ده مش كافي لازم كمان يكون فيه امدادات.
جمال:طب نعمل ايه.
مُنير: انا هتواصل مع العَمَار ولو حصلي حاجة لاقدر الله هما هيدخلو.
**********
هجم العمار على الغيلان وبدأو في ابادتهم كلهم لحد ما فضل غول لوحده.
طلع واحد من العَمار وباين ان هو قائدهم وقال:القصاص، العين بالعين والسن بالسن والبادئ أظلم، من قتل يُقتل.
ومسك سيف مُنير ودبح راس غول!
وانتهت المعركة وكله اختفى وراح عن جمال ناحية مُنير ومبقدرس يمسك نفسه وفضل يبكي على فراقه وقال: الوداع يا منير، هتفضل مكانتك محفورة في قلبي ياريت اليوم ده مكانش ييجي، اليوم اللي اشوفك فيه ميت بالطريقة دي.
بدأ جسم منير يشع نور واختفى مرة واحدة.
رجع عم جمال وآلاء وعملوا بلاغ في القسم ان حامد مفقود والقسم دور ولقى جثة حامد والراس مفصولة عن جسمه.
والقضية اتقفلت ان فيه سفاح هو اللي قتل حامد بالمنظر ده.
تمت بحمد الله...
