عقوق
قلت له بعلو صوتي: أنت مستحيل تكون أب أنت أكبر عدو ليا!
_ياخي حرام عليك أنا مبقتش طايق أعيش معاك في بيت واحد.
=أنت ابن فاشل أصلا لا نافع في حاجة ولا ليك في أي حاجة يا خسارة فلوسي وتعبي فيك..
شوفت ابن عم محمود اهو جاب مجموع احسن منك في الثانوية والناس بتقولو يا دكتور..
الناس كلت وشي بسببك وكلت وش امك وبيعايرونا بيك..
ابن عم جمال مش سايب فرض في المسجد اشمعنا أنت مش بتنزل تصلي ناقصك ايه.
-ياعم أنا ربنا لسا مهدانيش إنك لا تهدي من أحببت...
=وأنا بصراحة مش هستنى لما تتهدي أنت هتنزل تصلي لو بالعافية، اشمعنا ابن الحاج حسين هو العاق، اشمعنا ابني أنا بيتضرب بيه المثل في الفشل!!!
اتدخلت امي في الوقت ده وبعدتنا عن بعض زي عادتها في أي خناقة بيني وبين أبويا ، لبست الشورت بتاعي ونزلت قولت أتمشى.
وأنا في الطريق شوفت عم جمال اللي دايمًا بيعتبرني فاشل وبيعتبر أهلي انهم ناس فشلة، وكان معاه إبنه محمد اللي دايما بيفتخر بيه قدام أبويا تحديدًا.
قالي ونظراته كلها شماتة:ايه يا شهاب عامل ايه؟ لسا برضو بتدور على شغل؟!
قلت له:ربنا هو الرازق يا عم جمال.
قالي:ونعم بالله بس اسمحلي أنت معاكش مؤهل اصلا!
أنت يعني مش زي ابن عم محمود الدكتور شوف بيشتغل فين دلوقتي والبنات النضيفة كلها بتجري عليه..
وأنا إن شاء الله ممكن أجوزه بنتي.
قلت له: ربنا ييسر الحال ياعم جمال.
قالي: يارب.
سبتو ومشيت وأنا نفسي الراجل ده يموت النهاردة قبل بكرة.
*******************************
ايه حسين أنا عم جمال عامل ايه يا راجل يا طيب، بقا يا راجل ابنك ينزل بالشورت كدا وأنت سايبه ينزل بالشورت.
الشورت حرام يا حسين...
إبنك بس اللي بيعمل كل حاجة حرام اصلا يا حسين..
بينزل بشورت فوق الركبة، ومش بيصلي ولا بيعمل اي حاجة.
التعليم يا اخويا يا حسين وقولنا ماشي معرفش يفلح فيه، حتى الحاجات المحرمة كمان بيعملها أنتم معرفتوش تربو الواد ولا ايه ولا هو عنده عقوق.
*******************************
بعد ما اتمشيت رجعت البيت لاقيت ابويا في وشي.
قالي:هما كلمتين هقولهملك إياك تنزل بالشورت ده تاني.
قلت له:في ايه ده شورت عادي نزلت اتمشيت بيه ورجعت.
قالي: أنا اتعايرت بيك أنت إيه ياخي مش بتحس لازم توسخ سُمعتنا.
قلت له: سُمعة إيه ده شورت هو أنا روحت بيه مشوار ده انا بس اتمشيت.
قالي ونظرات الغضب بدأت تطلع من عنيه:متجادلنيش، انا قولت كلمة وخلاص مش هتنزل بالشورت يعني مش هتنزل بالشورت يا اما هحبسك في اوضتك.
*******************************
زهقت من قعدة البيت فا قولت ليه لا انزل أصلّي المهم متحبسش في البيت كدا..
نزلت روحت الجامع واتوضيت وصليت المغرب، بعد ما صليت المغرب قولت أقعد شوية في الجامع بصراحة اتخنقت من البيت، وأنا قاعد عدى عليا راجل كبير بصلي وقالي مالك مهموم ليه؟
قلت له:تعبان شوية يا حاج.
لاقيتو قعد جمبي وقالي:مالك احكيلي انا زي والدك برضو.
قلت له: بص يا حاج انا جاي هنا عشان انا مخنوق من البيت فا بعد اذنك بلاش تتكلم معايا.
قالي:اهدى بس انا عايز احاول ازيح الهم من على كتفك.
قلت له وانا بقوم:شكرا ليك يا والدي بس فعلا مش عايز اتكلم مع حد.
قومت مشيت لاقيته بيقولي: بيزعقلك عشان عايز يشوفك أحسن من الناس دي كلها مش عايز حد يكون أحسن منك أوعى تفكر أنه فرحان لما بيشوف الناس بتتريق عليك، ده بيبقى بيغلي من جواه وبيحاول يشوفلك طريقة يجعلك بيها أحسن حد.
أتلفت وقلت له: أنت بتكلمني؟
ضحك وقام جاب مصحف وقعد يقرأ فيه.
روحت البيت وقلعت لبسي لاقيت ابويا جايلي وأنا في دماغي يا ترى هنتخانق في إيه المرادي؟
قالي: كنت فين؟
قلت له :كنت في الجامع أظن بقا رغبتك اتحققت .
قالي: طيب، خلي بالك إن أنت المفروض تروح تاخد كورسات عشان تظبط نفسك في اللغة وإن شاء الله نشوفلك شغل.
في الوقت ده تلفوني رن ولاقيت صاحبي بيتصل خدت التلفون وطلعت برا ورديت عليه:خير.
قالي:بقولك ايه احنا خارجين هات فلوس وتعالى اخرج معانا.
قلت له: لا مش هينفع ما أنت عارف اللي فيها.
قالي:ياعم ما تسيبك من أبوك ده، يعني أبوك ماشاءالله معاه فلوس شوف مش راضي يصرف عليك ازاي، لا راضي يديك فلوس تخرج ولا راضي يديك فلوس تنزل تشتري لبس زي الناس.
ابوك يابني مش صديق ابوك عدو ليك، طب هقولك أنت اقفل معايا وقوله عايز فلوس عشان نازل وشوف هيقولك ايه، يابني ابوك مش عايز يبسطك ولا يدلعك، ابوك عايزك مش مبسوط مغموم طول الوقت.
قفلت فعلا مع صاحبي وروحت لأبويا
وقلت له:صحابي خارجين و أنا عايز فلوس عشان أخرج معاهم.
قالي:لا معيش فلوس.
قلت له:يعني أنت معاك فلوس للكورسات وجت على انبساطي وإني أرفه عن نفسي شوية مش معاك فلوس.
قالي:أه أنت كدا صح.
قلت له بعلو صوتي: أنت مستحيل تكون أب أنت أكبر عدو ليا، كلام صاحبي طلع صح.
قالي بنبرة هدوء غريبة: أنا عدو ليك!!
ياعيني مخك صغير مش فاهم حاجة ومش فاهم أنا بعمل إيه عشانك وإني محضرلك شغل ايه.
قلت له:هيكون إيه يعني أنت يهمك أني يكون منظري وحش قدام الناس.
قالي: اللي انت شايفه وخد فلوس أهي انزل اخرج مع صحابك يابني.
استغربت جدا من طريقة كلامه وانه مستسلم اوي.
قلت خلاص المهم اني هتبسط.
روحت مع صحابي فعلا وقضينا ليلة زي الفل....
بعد الليلة دي بيومين لا إراديًا حاجة خلتني أنزل اصلي في الجامع...
نزلت صليت ولاقيت نفس الراجل العجوز برضو..
قالي: المرادي أنت مزاجك مبسوط صح؟
قلت له:أهلا يا حاج، اتفضل اه ياعم مزاجي رايق..
قالي: يا خسارة يابني.
قلت له: في ايه.
قالي: مش مستوعب ياعيني هييجي عليك يوم وتقول ياريتني ما كنت اتبسط مع دول.
قلت له: مش فاهم
قالي:ومش هتفهم، مخك صغير وعينك بتبص على دلوقتي مش بتبص على قدام..
قلت له: أنت مجنون شكلك والله...
لاحول ولا قوة إلا بالله مالك يابني.
بصيت ورايا لاقيت إمام المسجد قلت له:شوف ياعم الراجل المجنون ده.
واتدورت والراجل مرة واحدة اختفى.
قلت لإمام المسجد:والله العظيم كان فيه حد هنا.
إمام المسجد قالي: ده عم جمعة هو طلعلك ولا ايه؟
قلت له: مين عم جمعة ده؟
قالي:ده واحد يابني كان راجل طيب اوي وبتاغ ربنا، ولاده في يوم جمعوا فلوس عشان يودوه دار مسنين بعد ما أمهم ماتت فا يابني الورق بتاع الدار مخلصش والعيال مكانوش طايقين أبوهم فا رموه بشنطته وحاجته قدام المسجد، ومشيو والراجل ياعيني من حسرته على ولده مات.
في الوقت ده كان اخويا الصغير دخل الجامع بيجري بسرعة وقالي الحق يا شهاب باباك مات!!!!
انا جريت بسرعة ع البيت لاقيت أمي عمالة تصوت والجيران عمالين يهدوا فيها وأنا دخلت الشقة.
مش مصدق اللي حصل لاقيت أمي من وسط دموعها بتقولي:أبوك كان سايبلك الورقة دي.
فتحتها وقريتها كانت حاجة اشبه بالوصية.
بتقول:
السلام عليكم ابني حبيبي شهاب لما تقرى الورق ده أنا هكون عند ربنا، أنا عمري في حياتي ما كنت عايز أضايقك ولا عايز اكبتك أنت اللي فاهم غلط صحابك فهموك غلط، بص يابني الناس عيالها ناجحين وأنا كنت عايز اخليك ناجح زيهم، أنا عايزك أحسن واحد في الدنيا، أنا مش بكرهك يابني، مفيش أب بيكره ابنه.
لما كنت بقطع عنك الخروجات ولما مش برضى أديك فلوس كنت بحوشهملك عشان أنا لاقيتلك وظيفة برا مصر وبمرتب محترم بس طالبين إنك تاخد كورسات اللي أنا كنت محضرلك فلوسها وأنت افتكرت إني مش عايز اديلك فلوس.
أنا كنت عايزك انجح من اي حد وييجي اليوم اللي ترفع فيه راسي وتخلي الناس اللي بتتريق علينا دي تحط جزمة في بوقها.
أنت عينك بصت على دلوقتي بس مبصتش على قدام.
تمت بحمد الله..
