مُذكرات مُحتال
( الجزء الأول)
أنا أكبر نصاب في الدنيا ، بحكم وظيفتي اللي تقريبًا مش ببذل فيها أي مجهود ، كل اللي بعمله إني بسمع ، و دي حاجة ممتعة جدًا بالنسبة ليا ، كل قصة بيحكيها مريض بطلع منها بخبرة جديدة و درس مستفاد ، يعني المفروض بنهاية كل جلسة أنا اللي أدفع لهم ! لكن اللي بيحصل العكس ، في سنتين بس حققت شهرة محلمتش بيها و بقيت محبوب من كل زوار العيادة ، كل ده بس علشان بسمع....
خبطة الباب دي بتاعت نسمة ، بس هي مش عارفة إن الساعة ٨ و نص و انهاردة يوم الأربعاء ، المفروض خلصنا يا نسمة !!
- اتفضلي
- أنا آسفة يا دكتور ، بس فيه حالة برة و مُصر يقابل حضرتك...
- يا نسمة ! ، انتِ عارفة إنهاردة ايه ؟
- عارفة يا دكتور ، بس هو لازق و مش عايز يمشي
بلغته إن حضرتك عندك مشوار قالي هيستناك !
و قالي إن حضرتك محدد معاد العيادة الساعة ٩ ، اي نوع من الدكاترة مش بيلتزم بمعاده !!
- هو الدكتور ده آلة مش بني آدم !!
- معلش يا دكتور علشان خاطري خلصه ، و يتعوض الماتش اللي هيفوتك إنهاردة !
- تاني يا نسمة !!
- معلش ، كمان مرة معلش ، بس معنديش استعداد اتعامل مع الشخص المستفز ده تاني !
- طيب يا ستي ، خليه يتفضل يدخل و أمري لله !
أكيد نسمة بتغلي دلوقت و بتلعن اليوم اللي جت فيه هنا ، و عندها حق ... مفيش دكتور بيلغي كشوفات المرضى بتوعه علشان ماتش - و إن كان دوري أبطال أوروبا يعني - إلا اللي وقع في حظها و نصيبها !
وصل الضيف الأخير اللي هيفوت عليا ربع ساعة من الماتش ، شكله شاب ظريف و مش غلس عكس اللي توقعته نسمة .... المشكلة إنه جاي في وقت غلط ! ، و طبعًا مش المفروض يحس بده ، يلا يا دكتورنا يا شاطر ارسم ال smiley face بسرعة قبل ما يلاحظ إنك متضايق ، مش مهم حتة ماتش لا راح و لا جه قدام مساعدة شخص محتاج مساعدة ، بس .. مهو اصل ... يا جماعة السمع مزاج ، و لو مش في المود مش هسمع ، و ده مش حتة ماتش ، ده دوري الأبطال !
- اتفضل يا عصام ...
طبيعي أنه يرتبك ، زمايلي بيحبوا المريض يقدم نفسه ، أنا لا ، فيه مهارات لازم نمارسها حتى لو اللي قدامك عارف إنك بتعمل كدة بحكم وظيفتك ، لأن ببساطة النوع ده من المهارات بيتخطى الإدراك الأولي و بيديه شعور بالراحة ...
- قبل ما تبدأ تعرفني بنفسك حابب أقُلك إني عارفك ، حقيقي عارفك ، انت مش محتاج تكلم دكتور نفسي علشان يشوف اللي الناس شايفاه فيك يا عصام ، إحنا بنعرف من قبل ما تتكلم ، لو هعاملك كحالة جاي تكشف و تمشي كنت هسيبك ترغي ، بس انا مش هتعامل معاك انك حالة و جاي تكشف أو تقدم نفسك ، احنا من سن بعض يا عصام ، تسمحلي نبقى أصدقاء ؟
هي نص ساعة و هتنسى انك كنت هنا أصلًا ، بس هعمل ايه ، اكل العيش ....
- مفيش مشكلة يا دكتور..
- لا لا لا ، انسى الكلمة دي خالص ، انت عارف اسمي يا عصام
اشمعنى انا بقُلك يا عصام و انت كمان دكتور !
- عرفت منين ؟
- انت قلتلي دلوقت حالًا !
الحقيقي مش دلوقت يا عصام ، الكشف بيبقى معايا بكل الناس اللي حجزت من اليوم اللي قبله ، و هي نص ساعة على فيس بوك و مع المعلومات اللي بتاخدها السكرتيرة و اللي انت بتشوفها عادية مش بتبقى عادية بالنسبة ليا و بتوصلني بنسبة ٩٠% للشخص المطلوب ، مش قلت لك قبل كدة إني نصاب !!
- بس انا متكلمتش
- و انا قلت لك انا عارف من غير ما تتكلم !
صدقتني ؟
- أيوة يا د...ايوة يا...سامي !
- كويس ، كويس انك مقلتهاش علشان تضايق منها اوي ، و انت عارف اني بتضايق أما حد بيقُلي يا سمسم !
سيجارة يا عصام ؟
- لا يا س..د...سامي !
- كويس يا صاحبي ، انا عارف إنك بتحاول تبطل من فترة ، كويس انك منتظم
و مقدر انك راعيت كمان إني مبدخنش و مرضتش تشرب قدامي ، قُلي بقى يا صاحبي .... ايه اللي مضايقك و مخليك مكشر كدة بقالك فترة ..
- حاجات كتير يا سامي ، حاجات كتير و مش عارف ابدأ منين !!
- لا يا صاحبي انت عارف ، اتكلم و انا هسمعك ، و متخافش مهما كان همك هتلاقي حل !
- هي دي المشكلة يا سامي !!!
انا مش بتكلم ، و لو اتكلمت مش بحكي !
اخلص يا عصام !! النص ساعة قربت تخلص ، مش وقت فلسفة ده !
انا باصصلك اهه ، ارغي يلا !
- طب جربني ، مش يمكن ترتاح و تحكي ؟
- ينفع حد يشتكي من كل حاجة حواليه ؟
بس كدة ، مش تقول من بدري يا عصام ! ، انت عايز كلمتين تنمية بشرية ممكن تاخدهم من بوست على الفيس ، أو واحد صاحبك على القهوة ، إنما جاي و مأخرني كل ده علشان تقول كدة ! ..... ما علينا
- كل حاجة غلط يا سامي ، مع إن كل البدايات بتبقى عظيمة !
في الشغل بعد ما اتعينت في الشركة اللي نفسي فيها من ايام الكلية ، نسيت اقلك صح إني صيدلي مش دك...
- عارف !
ايه ده ! ، انا قاطعته و هو بيتكلم !! ، فيه دكتور يعمل كده !
٢
الحقيقة مفيش دكتور يعمل كدة خالص ! ، دي من مباديء شغلنا ! ، بس هو المفروض يتفهم ده ، لو هيعتبرني صديقه !
- أنا آسف يا عصام ، كمل ...
- بعد ما اتعينت فيها لقيت تكتلات و شلل في بعض ، محدش بيعلمني حاجة ، و ممسكني حاجات اي حد معاه ابتدائية ممكن يعملها !
بقالي شهور بعافر علشان اتعلم ، هشيل شغل و مش هشتكي بس يبقى الشغل اللي بقالي سنين بتعلم علشانه ، و لا حياة لمن تُنادي !
طيب اسيب الشغل و ارجع أقف في الصف مع اغلب زمايلي العاطلين ، و لا استحمل الذل و القرف ده ؟
و كله جاي معايا بالسلب بسبب ده ، علاقتي بأهلي شبه انقطعت ، محدش فاهمني يا سامي !
كله شايف إني في نعمة و مش المفروض اعترض ، و مفيش حاجه من غير مشاكل ، بس مش كدة ! ، مش ده نوع المشاكل اللي المفروض اتحمله !
سكتت ليه يا عصام ، انت لسة مخلصتش يا صديقي ، لما تقول كل حاجة يبقى انت قاصد حاجة واحدة اهم من كل دول ! ، و انا مش هعلق على كل ده ، يمكن تقصد بأنك مش بتتكلم و مش بتحكي إنك بتسرد كل التفاصيل من غير اهم تفصيلة فيهم ، و كله بيبادر بالنصح على طول و مش بيستنى يسمع الجزء الأخير من حكايتك ، اهو خلينا نقول اهم جزء !
- حتى البنت اللي افتكرت إنها هتبقى جنبي في كل المشاكل دي اتخلت عني بكل بساطة كأني توكة متعلقة في شعرها و جه الوقت علشان تخلعها !!!
و هو ده اللي مضايقك يا عصام
- و هنا المشكلة يا سامي
أو هنا المشكلة يا دكتور سامي ....
بتعمل ايه يا عصام ! ، انت هتمشي !!! ، بس كدة ؟! طيب مش انت قلت دكتور ، اسمع النصيحة على الأقل ، هي مش هتبقى مختلفة كتير عن الشعارات اللي بتسمعها ، بس هو ده اللي انت محتاجه دلوقت ، و انا عندي الصيغة المناسبة اللي هتقنعك بيه ، بس انت مش عايز تسمع ! ، شكلك ما صدقت كملت حكايتك أخيرًا ! ، كويس ، انا كمان ألحق أتفرج على الشوط التاني على الأقل ، بما إنك مش عايز تسمع..
- عن اذنك يا دكتور ، كنت عارف من الأول إني هعمل نفس الحركة ، مفيش أمل يا دكتور !
ايه !! ، انت تقصد إنك كل ده متكلمتش عن المشكلة أو الأسباب اللي ضايقتك بجد ، معقول فشلت !! ، كل ده كنت بتتكلم مش بتحكي ! ، بس لا .... انا مش فاشل يا عصام ! مش ده اللي انت جاي تثبته ؟! ، دلوقت بس فهمت قصدك..
- رايح فين يا صاحبي ، كدة تمشي من غير ما نخلص كلامنا ؟!
- اي كلام ممكن تقوله مش هيفيد يا دكتور..
- لا يا دكتور ، مش انا اللي هتكلم ، انت اللي لسة مخلصتش !
كل الكلام اللي قلته ده عبارة عن نتائج مش أسباب ، و علاج النتائج ده زي علاج العرض بدل المرض ... علشان كدة انت مش لاقي حد يفهمك ، علشان أفضل حد فيهم بيديك مسكن ، مش غلطتك لأن المريض كدة كدة بيوصف الأعراض ، و مش قضيتهم إنهم يكتشفوا المرض لأن مفيش حد فيهم دكتور ...
- أنا عمري ما اديت تفاصيل اكتر يا دكتور !
- متقلقش ، انا مش هنا علشان احكم عليك ، انت اللي مصر تحكم عليا و تخليني دكتور ، و احنا صحاب يا عصام ، أنا مش بس صاحبك ، أنا أكتر حد فاهمك بشهادتك انت !
٣
- البنت يا سامي .. رغم اهتمامي بيها و إني شايفها و فاهمها بس هي مش فاهماني !
اول ما عرفتها كنا بنتكلم كتير جدا ، انا فهمتها و فهمت شخصيتها و اعجبت بيها ، بس هي لحد دلوقت لسة متعرفنيش !
و اه ، معاها أنا بتكلم اكتر من اي حد ، بس مش بحكي !
- علشان هي مش عايزاك تحكي يا عصام !
البنات بطبيعتهم رغايين ، بس هي تقدر تبقى ملاذك الآمن و تقدر تخليك تطلع كل اللي عندك ، بس لو حبت !
هي بتمنع نفسها منك ، و ده له سبب هي لوحدها تعرفه ، و علشان كدة انت مستني فرصة مناسبة تعترف باعجابك و الفرصة مجتش لحد ما كرهت الوضع ، كرهت تستناها و هي مش بتستناك ، و بدأت تشوف حقيقة إنها سهل تتخلى عنك رغم إنك مش مستعد تفرط فيها تحت اي ظرف ، و اللي زود من ألمك إنك مستعد تديها كل حاجة و هي مش مستعدة حتى تتعرف على الشخص المستخبي ورا كل الزحمة دي !
اعمل زي ما قالت و دوس على قلبك و انسى...
ايه اللي بهببه ده ! ، انا اللي بتكلم مش هو ! ، و ايه اللي خلاني افتكرتها دلوقت !!!! ، و انا اللي بقُلك تنسى ؟! ، يلا ، مش كل الذكريات بتأذي ، ممكن تخليك تعيش الموقف بمشاعرك و لا اجدع ممثل ، لأنك فعلًا مش بتمثل !
- حقيقي يا سامي ، كل اللي قلته حقيقي ما عدا اخر جملة دي ، هي عمرها ما طلبت مني انساها
- بس مع أول اختبار عملت ايه ؟
- مشت كأننا مكناش !
- يبقى متستاهلش يا عصام ، انت أولى بكل الوقت اللي بتاخده في التفكير فيها ! ، قلبك يستحق اللي تقدره مش اللي تشحططه وراها ، و انت مش ناقص يعني ....
ارمي ورا ضهرك و انا عارف إنه صعب ، بس هو ده المتاح ، لو عرفت قيمتك هترجع ، و لو معرفتش هتيجي اللي تعرف ، القصور عندها هي يا صديقي مش عندك انت ..
- ناس كتير قالت انساها ، بس انت اول واحد يحببني في نسيانها !
- يا صاحبي انا عارف النوع ده و عن تجربة صعبة ، لما يجي وقت مناسب هبقى احكي لك !
- برافو ، برافو يا دكتور ، انت عايش الدور و لا أجدع واحد من صحابي !
و حلوة ابتسامة السخرية كأنك مستنكر كلامي دي !
- انا هسألك سؤالين و من خلال اجابتك هنوصل لحل لباقي المشاكل ...
بتحب الأفلام ؟ و بتحب الكرة ؟
- الأفلام مش اوي ، الكرة اه طبعًا ... اشمعنى ؟
- جميل ، عندي مشكلة و عايزك تساعدني في حلها
- قول
- انا بلعب في نادي في الدرجة التانية و المدرب ظالمني ، مديني أدوار كتير مش بتاعتي و دوري الحقيقي اللي اتقنته بمهارة عالية مش بيستخدمني فيه ، تنصحني بايه ؟
- اتكلم مع المدرب طبعًا !
- طيب و لو ملقتش منه استجابة اعمل ايه ؟
- دور على فريق تاني في اسرع وقت
انت كدة بتدفن نفسك بنفسك ! ، لو مش مستجيب لك و لطلباتك هيدمرك ، دور على مكان تاني تحقق فيه ذاتك بس لحد ما تلاقي المكان ده متخسرش ثقته و اعمل اللي بيطلبه منك ، علشان تعرف تسوق نفسك صح و مفيش نادي ياخد انطباع عنك انك بتاع مشاكل و مش بتسمع كلام مدربك ...
صح كدة يا عصام ، سكوتك ده معناه انك فهمت ، انت دلوقت آندي دوفرين في سجن شاوشانك ، طالب بكل حقوقك من غير مشاكل في الشغل كأنك مكمل معاهم لحد آخر نفس ، و دور على مكان تاني يقدرك احسن من بكرة الصبح !
- وصلت يا سامي ....
- عظيم ، كدة مش فاضل الا علاقتك باصحابك و أهلك ، أو خلينا نقول علاقتك بالناس عمومًا ....
دي اعتقد انت اللي مقصر فيها بسبب كل اللي اتكلمنا فيه ، بس حاول تستفيد من الوضع ده ، احيانا بتاخد خطوة لورا علشان تدينا قوة دفع لخطوات كتير قدام ، خد وقتك و قيم كل علاقة ، و ابدأ صلح على مهلك ، هتاخد وقت طويل ، بس خليك واثق إن النفس البشرية زي الأرض الخصبة بالظبط ، مش بنجني منها إلا اللي بنزرعه فيها ، ولو الأرض اللي قدامك بور ، فأنت مش هتعرف الا لما تجرب كل الأصناف الصالحة للزراعة ... و تبقى عملت اللي عليك.
- جميل يا دكتور ، بس عندي تعليق واحد بسيط ..
- قول يا صديقي
- ليه مقُلتش من أول الجلسة إن حضرتك لك في الكرة ، على الأقل كنا لحقنا الماتش اللي ضاع ده !
- اللهم إني لا أسألك رد القضاء !
انت تدفع ٣ أضعاف الكشف بعد الجملة الأخيرة دي !
أيوة كدة ... اضحك يا عصام ، صدقني زي ما فيها الحلو فيها الوحش ...شكرا و اكيد مش علشان الماتش اللي فات بسببك ، شكرا علشان دي اول مرة احس اني عملت فيها مجهود من سنتين ! ......
ما تردي يا ست نسمة !!
- نسمة
- أيوة يا دكتور
- ردي لعصام رسوم الكشف ، و لو جه في اي مرة تانية كشفه مجانًا
- أفندم ! .....اه ...اقصد حاضر يا دكتور .. ممكن اعرف السبب بس
- مش اكتشفت أنه صاحبي !
يتبع...
٤
الكاريزما مهمة جدًا في تسهيل عملية التواصل مع الناس ، لو انت شخص عندك كاريزما مش هتحتاج تبذل اي مجهود علشان ده يحصل ، بالعكس ، الناس هم اللي هيجروا وراك لمجرد لفت انتباهك ... طيب و لو معندكش كاريزما ؟! ... محدش هيشوفك ، كلامك مش هيبقى مهم حتى لو بيتكلموا في اتفه المواضيع ، لما تيجي انت برأي ممكن يبقى عظيم في موضوع حيوي محدش هيهتم ، و هيعملوا skip زي كل مرة...
انهاردة نسمة مختلفة ، متضايقة ؟ اكيد... اول مرة اشوفها مهمومة كدة ، لو كانت مرتبطة كنت قلت اكيد متخانقة معاه ، الهم أو في اللغة العربية " الوجوم " اللي ظاهر عليها ده مش بيجي للبني آدم الا بوجع قلب مكتوم ، و نسمة مش من النوع اللي بيخبي عني حاجة ، منطقى ؟ ، اكيد بحكم مهنتي ، يعني حد يبقى شغال مع دكتور نفساني و يكتم همه ؟! ، فاللي مش منطقي إنها مجتش تحكي لحد دلوقت ، و استنتاجي إن الموضوع له علاقة بالمشاعر ، يمكن لسة مش متأكدة ؟ ، بس لحظة ، ليه كل الاهتمام ده بنسمة ؟! ايه يا دكتور ! انت هتنسى المبدأ و لا ايه ! مفيش علاقات في الشغل و مفيش علاقات مع مريض أو حالة ، و الاتنين اتجمعوا فيها !
بتعجبني خبطة ايدها المميزة و الرقيقة على الباب ، اخيرا يا نسمة ، اتقل انت بس كدة و هي هتطلع كل اللي عندها زي كل مرة ، اهم حاجة اوعى تسألها !!
- اتفضلي يا نسمة
- فيه حالة برة يا دكتور ، تحب اخليه يستنى برة لحد ما تخلص قهوتك ؟
- لا طبعًا ! ، آخر حاجة محتاجها أنيس إنه يحس بقله تقدير ، و رغم إنه مش دوره بس انا عرفت إنه جاي بدري ، خليه يتفضل...
ا.. نسمة !
- نعم يا دكتور ؟
- ....... ما .... مفيش يا نسمة
- آخر كلام ؟!
- في كل الحالات خليه يجي ، انا بس كنت هسأل ... و لا تشغلي بالك.
التغيرات اللي بتحصل في علاقتي بيكِ لازم لها حد يا نسمة ، العلاقات اللي زي دي بيبقى محكوم عليها بالفشل إلا لو كانت في إطار هروب من علاقة تانية أو للمتعة و بس ، شفتي إطار تاني بتنجح فيه علاقة الدكتور و الممرضة أو الدكتور و السكرتيرة ؟! لا يا نسمة ، و انا مش من النوع يدخل في علاقة عابرة أو مش رسمية ........ و انتِ كمان
خبطتك تاني ، خلاص اتعودت إن الصوت اللي بيقطع حبل أفكاري عنك بيبقى منك !
عادي ، شكله عادي ، اكيد الشخص الانطوائي مش بيبقى مكتوب على جبينه إنه انطوائي ! ، بس بيبقى مكتوب على ملامحه الخنقة اللي كان لها سبب خلته انطوائي ، إنما أنيس لا ، هو اتعلم يهزر و يضحك و أجاد الصراحة ، و لو مكنش جاي العيادة مكنتش شكيت للحظة إن فيه مشكلة ، و الشك ده قادني لنظرة سريعة على البروفايل بتاعه ، أو خلينا نسميه مفتاح شخصيته زي ما اتفقنا ...
عدد الأفلام اللي اتفرج عليها مهول بالنسبة لحد في سنه ، و مفيش مانع لو خطف مسلسل وسط زحمة أفلامه دي .. ، لما بيعمل check in في السنيما مفيش و لا منشن لأي حد من صحابه ، سينجل بائس ، مفيش اخوات ، و ده يقودنا لأن الإنطوائية اتفرضت عليه إلى حد ما... تعالى نخرج من قوقعتك للعالم يا أنيس...
يُتبع....
